Orti Bali (Gatra Bali)

Om Swastyastu,

Pamiarsa rasa angayubagia titiang (wastan) rauh malih ring ajeng pamiarsa jagi ngaturang gatra mabasa bali sajeroning gatra bali ring TVRI Bali. Ainggih pamiarsa durus piarsayang gatra bali sajangkepnyane. Aturang titiang gatra kapartama, pamiarsa pedasan hektar palemahan pasawahan ring subak gombeng kaler desa nyalian klungkung nenten karunguang olih krama tani puniki, sangkaning sampun kalih tiban nenten ngamolihang toya. Rauh mangkin karma tani kantun nyantos kakepas pamerintah apeketan ring pikobet toya sane karepin.

Sapuniki pakantenan palemahan pasawahan ring subak gombeng kaler desa nyalian kabupaten klungkung sasampune kalih tiban nenten ngamolihang toya, tambis makasami pasawahan katumbuhin makatah entik-entikan liar sangkaning sampun nenten malih karunguang olih karma tani sane nuenang utawi panggarakne. Nenten karunguangne pasawahan puniki mawiwit saking kidikne pasokan toya sane kapolihang utawi kalirang saking bendungan giri sane wenten ring desa tembuku bangle. Punika mawinan sangkaning jimbarne pasawahan sane patut kambahang toya ring subak gombeng kaler. Prajuru subak nepasang antuk magiliran sakewanten majeng ring palemahan pasawahan sane wenten ring sisi kaler, sangkaning genahne sane doh ngawinang embahan toya nenten sida kalirang mawinang kalih tiban ngetuh. Tiosan ring mewehanne ngamilihang toya, seka pasubakan gombeng taler ngarepin pikobet makehne bojog sane ngusik tanduranne. Mawinan karma tani desa puniki sakadi sampun ngekoh ngolah tegal pasawahanne.

Sangkaning ngabotne pikobet sane karepin puniki, sampun makeh karma tani sane ngambil swagina tiosan sakadi buruh tani utawi tukang ring desane. Tiosan punika sane mautsaha nglanturang swagina pinaka petani ngubah pasawahanne dados perkebunan majalaran nandur cengkeh. Karma tani subak gombeng tambengan mangkin kantun nyantos solusi saking pemerintah sajeroning nawehin pikobet ngamolihang toya mangda sida malih nandur padi, saking klungkung TVRI Bali.

Ainggih pamiarsa wantah asapunika gatra bali sane prasida kaaturang ring rahinane mangkin. Nenten lali titiang ngaturang suksma antuk uratian pamiarsa sane sampun ngamiletin gatrane puniki. Pinaka wusan uning atur puputang titiang antuk parama santih.

Om Santih, Santih, Santih Om